गेल्या काही महिन्यांपासूव पुण्यातील गुन्हेगारीच्या घटना वाढल्या आहेत. कल्याणीनगर परिसरातील हिट अॅंड रनचे प्रकरण ताजे असताना आता शहरातील एका महिला पोलीस अधिकाऱ्यावर हल्ला झाला आहे.समोर आलेल्या माहितीनुसार पुण्यात महिला वाहतूक पोलीस अधिकाऱ्याच्या अंगावर पेट्रोल टाकून या अधिकाऱ्याला जिवंत जाळण्याचा प्रयत्न झाला आहे. त्यामुळे संपूर्ण शहर हादरले आहे. याबाबत सविस्तर माहिती जाणून घेऊयात…पुणे शहरातील फरासखाना वाहतूक पोलीस स्टेशनसमोर पोलीस कर्मचारी ड्रंक अँड ड्राईव्हची तपासणी करत होते. यावेळी वाहनचालकांना अडवून त्यांनी मद्यसेवन केले आहे की नाही ते तपासले जात होते. त्याचवेळी एका वाहनचालकाने महिला वाहतूक पोलीस अधिकाऱ्याच्या अंगावर पेट्रोल टाकून त्यांना जाळण्याचा प्रयत्न केला. ही घटना घडताच इतर पोलीसांनी आरोपी वाहनचालकाला ताब्यात घेतले आहे.
पोलीसांनी दिलेल्या माहितीनुसार, संजय फकिरा साळवे असे या आरोपीचे नाव आहे. तो मुळचा जालना जिल्ह्यातील रहिवासी असून सध्या पिंपरी चिंचवडमध्ये वास्तव्यास आहे. हा व्यक्ती दारू पिऊन गाडी चालवत होता. त्यावेळी पोलीसांनी त्याला पकडले. त्यावेळ वाद झाला. संतापलेल्या आरोपीने महिला पोलीस अधिकाऱ्यावर पेट्रोल ओतले व लायटकने पेटवण्याचा प्रयत्न केला. मात्र आरोपीने लायटर उलटा पकडला असल्याने आग लागली नाही. त्यामुळे मोठा अनर्थ टळला.या प्रकरणी पुण्यातील विश्रामबाग पोलीसांनी याप्रकरणी गुन्हा दाखल केला आहे. तसेच याप्रकरणी अधिक तपास सुरू केला आहे. पुण्यात आला पोलीसच सुरक्षित नाही त्यामुळे सामान्या जनतेचं काय होणार असा सवाल उपस्थित होत आहे. अशा घटना टाळण्यासाठी कठोर पावले उचलण्याची गरज आहे अशी भावना सर्वसामान्य नागरिकांनी व्यक्त केली आहे.
दरम्यान, काही दिवसांपूर्वी कल्याणी नगर येथे एका अल्पवयीन मुलाने आपल्या पोर्षे कारने दोघांना धडक दिली होती. यात दोघांचाही मृत्यू झाला होता. तेव्हापासून शहरात उशिरापर्यंत सुरू असलेल्या हॉटेल्सवर कारवाई करण्यात येत आहे. त्यामुळेच ही ड्रंक अँड ड्राईव्हची तपासणी सुरु होती. मात्र आता या तपासणी दरम्यानच ही धक्कादायत घटना घडली आहे.
