स्वारगेट बस स्थानकातील शिवशाही बसमध्ये तरुणीवर बलात्कार

पुणे – पुण्यातून धक्कादायक बातमी समोर आली आहे, स्वारगेट बस स्थानकातील शिवशाही बसमध्ये २६ वर्षीय तरूणीवर बलात्कार केल्याची घटना उघडकीस आली आहे. या प्रकारामुळे खळबळ उडाली आहे.

संबंधित २६ वर्षांची तरुणी पुण्यातून फलटणच्या दिशेने निघाली होती. स्वारगेट एसटी स्टँड परिसरात आल्यानंतर एका ठिकाणी ती थांबली होती. यावेळी एका अनोळखी इसमाने तिला तिची एसटी दुसऱ्या ठिकाणी थांबली असल्याचं सांगितलं. माझी एसटी याच ठिकाणी थांबते, मी तिकडे जाणार नाही, असं त्या मुलीने त्या इसमाला सांगितलंही, मात्र मुलगी एकटी असल्याचा फायदा घेत त्या तरुणाने तिला त्याच्या शब्दात अडकवले. स्वारगेट एसटी स्टँड परिसरात असलेल्या एका अंधाराच्या ठिकाणी एक शिवशाही बस उभी होती. या ठिकाणी ती मुलगी गेली, आणि तिने ही एसटी तर बंद आहे असं देखील सांगितलं. पण, तू टॉर्च लावून आतमध्ये जा, हीच एसटी काही वेळात फलटणला निघेल, असं या नराधमाने तिला सांगितलं आणि स्वतः सुद्धा बसमध्ये शिरला. नराधमांनी शिवशाही बसमध्येच तिच्यावर लैंगिक अत्याचार केला आहे. पहाटे साडे पाचच्या सुमारास हा धक्कादायक प्रकार घडला आहे. हे प्रकरण उघडकीस आल्यानंतर परिसरात एकच खळबळ उडाली आहे. याप्रकरणी स्वारगेट पोलीस ठाण्यात फिर्याद दाखल केली आहे. पोलिसांनी बलात्कारासह विविध कलमांतर्गत गुन्हा दाखल केला आहे. पोलिसांनी सीसीटीव्ही कॅमेऱ्याच्या आधारे आरोपीची ओळख पटवली आहे. दत्तात्रय रामदास गाडे असं फरार आरोपीचे नाव आहे. आरोपी गाडे हा रेकॉर्डवरील गुन्हेगार असून त्याच्यावर शिक्रापूर पोलीस ठाण्यात गुन्हा दाखल असल्याची माहिती आहे. फरार आरोपीचा शोध पोलीस घेत आहेत.

स्वारगेट पोलीस ठाण्यात याप्रकरणी गुन्हा दाखल करण्यात आला आहे. आरोपीची ओळखही पटली असून आरोपीच्या शोधासाठी पोलिसांची आठ पथके रवाना करण्यात आली आहेत. गजबजलेल्या बस स्थानकात हा प्रकार घडल्याने कायदा सुव्यवस्थेचा प्रश्न चव्हाट्यावर आला आहे.