‘मला तू आवडत नाहीस मला तुझ्यासोबत राहायचे नाही’

बीड – सासरच्या छळाला कंटाळून बीड जिल्ह्यातील गेवराई तालुक्यातील राजुरी मळा येथील २२ वर्षीय विवाहित तरुणीने आत्महत्या केल्याची धक्कादायक घटना घडली आहे. सासरच्या लोकांकडून तरुणीला सतत पैशांसाठी छळ केला जात असल्यामुळे आत्महत्या केली.

सोनाली बाळू वनवे असं तरुणीचे नाव आहे. दोन महिन्यांपूर्वी सोनालीचा विवाह जंबुरा वस्ती येथील अनिकेत गर्जे याच्याशी झाला होता. लग्नानंतर अवघ्या एका महिन्यात सासरच्या लोकांनी तिच्याकडे ५ लाख रुपयांची मागणी सुरू केली. सोनालीच्या माहेरच्यांनी ही रक्कम दिली, परंतु त्यामुळे सासरच्या मंडळींची हाव अजून वाढली त्यांनी सोनालीला त्रास देने सुरूच ठेवले. त्यानंतर नवराही “तू आता आवडत नाहीस, मला तुझ्या सोबत राहायचे नाही” असे टोमणे देऊ लागला. याबाबतची माहिती सोनालीने तिच्या आईला आणि माहेरच्या लोकांना दिली होती पण तिचा त्रास कमी झाला नाही. अखेर ३१ ऑगस्ट रोजी सोनाली बेपत्ता झाली आणि तिचा शोध घेतला असता सासरी तिच्या घराशेजारीच असलेल्या एका विहिरीत तिचा मृतदेह आढळून आला. मृतदेहावर अनेक ठिकाणी जखमा असल्याचं पोलीस पंचनाम्यात नमूद करण्यात आलं आहे.

तलवाडा पोलीस ठाण्यात आत्महत्येस प्रवृत्त केल्याप्रकरणी पती अनिकेत गर्जे, सासरा एकनाथ गर्जे, सासु प्रतिभा गर्जे यांच्या विरोधात गुन्हा दाखल करण्यात आला आहे. पोलिसांकडून अधिकचा तपास सुरू करण्यात आला आहे.