पुणे शहरामध्ये दिवसेंदिवस अत्याचाराच्या घटनांमध्ये मोठ्या प्रमाणात वाढ होत आहे. यामध्ये बलात्कार, लैंगिक छळ, अत्याचाराच्या घटना मोठ्या प्रमाणात उघडकीस येत आहेत.येरवडा परिसरात एका 14 वर्षाच्या मुलीला दुचाकी शिकवण्याच्या बहाण्याने तिच्यासोबत अश्लील चाळे केल्याचा प्रकार उघडकीस आला आहे. याप्रकरणी येरवडा पोलिसांनी 42 वर्षीय नराधमावर पोक्सो कायद्यांतर्गत गुन्हा दाखल केला आहे.
याबाबत पिडीत मुलीच्या आईने मंगळवारी येरवडा पोलीस ठाण्यात गुन्हा दाखल केला आहे. यावरुन खाजा अमुद्दीन कामठान (वय-42 रा. येरवडा, पुणे) याच्यावर आयपीसी 354, 354(अ) पोक्सो अॅक्ट नुसार गुन्हा दाखल केला आहे. पोलिसांनी दिलेल्या माहितीनुसार, फिर्यादी यांची अल्पवयीन मुलगी रस्त्यावर सायकल चालवत होती.
त्यावेळी फिर्यादी राहत असलेल्या परिसरातील आरोपी खाजा कामठाने याने मुलीला गाडी शिकवतो असे म्हणून तिला गाडीवर बसवले. त्यानंतर आरोपीने मुलगी अल्पवयीन असल्याचे माहित असून देखील तिला अश्लील स्पर्श करुन स्त्री मनास लज्जा उत्पन्न होईल असे वर्तन केले. पिडीत मुलीने याबाबत आईला सांगितले. पिडीत मुलीच्या आईने पोलीस ठाण्यात धाव घेत आरोपीविरोधात फिर्याद दिली. पोलिसांनी आरोपीवर पोक्सो अॅक्ट नुसार गुन्हा दाखल केला आहे. पुढील तपास येरवडा पोलीस करीत आहेत.
