पुठ्ठ्याच्या खोक्यात आढळलेल्या मृतदेहाविषयी धक्कादायक माहिती समोर ! आरोपीला पोलिसांच्या ताब्यात, असा आला खुनाचा प्रकार उघडकीस

इम्रान यासीन पटेल (वय २४) असे खून झालेल्या तरुणाचे नाव आहे. इम्रान पटेल हा मुळचा कर्नाटकातील गुलबर्गा येथील राहणारा असून तो ४ वर्षापूर्वी पुण्यात आला होता. तो वॉटर प्लँट बसविण्याचे काम करत होता. त्यातील वादातून त्याचा खून करण्यात आल्याचे दिसून येत आहे.

याबाबत त्याचा चुलत भाऊ आसीफ महेबुब पटेल (वय २९) यांनी हडपसर पोलीस ठाण्यात फिर्याद दिली आहे. याबाबत पोलिसांनी दिलेल्या माहितीनुसार, हडपसरमधील हिंगणे मळा विसर्जन घाटावर एक कचरा वेचक मुलगा कचर्‍यातून काही वस्तू मिळताहेत का याची पाहणी करत होता. त्याला कचर्‍यात एक पुठ्ठ्याचा बॉक्स दिसून आला. तो जड लागत असल्याने त्याने तेथेच तो उघडला. तेव्हा त्यात एका पुरुषाचा मृतदेह आढळून आला. कचर्‍यात मृतदेह आढळून आल्याचे समजताच अपर पोलीस आयुक्त मनोज पाटील, पोलीस उपायुक्त आर राजा, सहायक पोलीस आयुक्त अश्विनी राख, वरिष्ठ पोलीस निरीक्षक संतोष पांढरे यांच्यासह पोलीस अधिकारी व कर्मचारी यांनी घटनास्थळाला भेट दिली.