पुण्यातील प्रसिद्ध फर्ग्युसन कॉलेज रोडवर असलेल्या L3 नावाच्या लिक्विड लेझर लाउंजमध्ये अंमली पदार्थ सेवन केल्याप्रकरणी एक व्हिडीओ व्हायरल झाल्याने खळबळ उडाली आहे.याप्रकरणी मुख्यमंत्री एकनाथ शिंदे यांनी गंभीर दखल घेतली आहे. मुख्यमंत्र्यांनी दिलेल्या कारवाईच्या आदेशानंतर पोलिस अॅक्शन मोडमध्ये आले आहेत. अंमली पदार्थ सेवन करणाऱ्या एका तरुणाला मुंबईतून अटक झाल्याची माहिती समोर आली आहे. दुसरीकडे पुणे ड्रग्ज प्रकरणी आणखी एका अधिकाऱ्याला तडकाफडकी निलंबित करण्यात आले आहे.
पुणे ड्रग्ज प्रकरणात राज्य उत्पादन शुल्क विभागाच्या आणखी एका निरीक्षकाचं निलंबन करण्यात आलं आहे. अनंत पाटील असे निलंबित अधिकाऱ्यांचे नाव आहे. राज्य उत्पादन शुल्क विभागाच्या आयुक्तांनी ही कारवाई केली. याच प्रकरणात सोमवारी निरीक्षक विठ्ठल बोबडे यांच्यावरही निलंबनाची कारवाई करण्यात आली होती.महाराष्ट्रातील पुणे शहरातील फर्ग्युसन कॉलेज रोडवर असलेल्या L3 नावाच्या लिक्विड लेझर लाउंजमध्ये काही व्यक्ती ड्रगसदृश पदार्थ सेवन करत असलेले व्हिडीओ व्हायरल झाल्यामुळे पोलिसांनी तपास सुरू केला होता. तर या प्रकरणी आता पुणे महापालिका प्रशासनानेही आक्रमक पवित्रा घेतला आहे. पुणे महानगरपालिकेकडून या हॉटेलवर कारवाई करण्यात येणार आहे. पालिकेची परवानगी न घेता हॉटेलमध्ये बदल केल्याने पालिका प्रशासनाने आक्रमक पवित्रा घेतला असून महानगरपालिकेच्या वतीने मंगळवारी अनेक ठिकाणी होणार कारवाई होणार आहे.
आतापर्यंत 14 जणांना अटक पुणे बार ड्रग व्हिडीओ प्रकरणी पुणे पोलिसांनी धडक कारवाई करण्यास सुरूवात केली आहे. आतापर्यंत 14 जणांना अटक करण्यात आली आहे. महाराष्ट्र उत्पादन शुल्क विभागाने सोमवारी संध्याकाळी हॉटेलमधील सहा वेटर्सना अटक केली.पुण्यातील L 3 बारमध्ये फॉरेन्सिक पथकाकडून ड्रग्स पडताळणीसाठी तपासणी करण्यात आली आहे . तसेच बारमधून काही नमुने तपासणीसाठी घेण्यात आले आहेत. बारमध्ये पार्टी करणाऱ्या दोघांचं ब्लड सॅम्पल पुणे पोलिसांनी घेतलं असून पुढे तपासणीसाठी पाठवण्यात आलं आहे. पार्टीमध्ये ड्रग्स सेवन केलं होतं का? याच्या तपासासाठी पुणे पोलिस या दोघांच्या रक्ताची चाचणी करणार आहे.
