पिंपरीत मध्यरात्री स्कार्पिओ मधून महिलेचे अपहरण?

पिंपरी – पिंपरी- चिंचवडमध्ये एका महिलेचे अपहरण झाले होते. या घटनेचा सीसीटीव्ही देखील सोशल मीडियावर व्हायरल झाला होता. मध्यरात्री काळभोर नगर पुणे- मुंबई जुना महामार्ग परिसरातून हे अपहरण करण्यात आले होते. पण याबाबत वेगळेच कारण समोर आले आहे.

पिंपरीतील काळभोर नगर परिसरातून महिलेच्या अपहरणाचा सीसीटीव्ही समोर आला आहे. तो सध्या सोशल मीडियावर व्हायरल होत आहे. जुना पुणे- मुंबई महामार्गालगत काळभोर नगर येथील एअरटेल गॅलरीच्या समोर मध्यरात्री एकच्या सुमारास एका महिला जात असताना स्कार्पिओमधून आलेल्या व्यक्ती तिला काहीतरी विचारत आहे. त्यानंतर तिथेच त्यांच्यात वाद झाला. त्यानंतर तिघांनी त्या महिलेला गाडीत टाकत अपहरण केले. महिला तिघांचा प्रतिकार करत होती. आरडाओरडा करत होती. परंतु, तिघांनी संबंधित महिलेला बळजबरीने उचलून गाडीतुन अपहरण केले असल्याचे व्हिडीओत दिसत आहे. सीसीटीव्ही फुटेज च्या आधारे हे प्रकरण कौटुंबिक वादातून झाल्याचा प्राथमिक अंदाज पिंपरी पोलिसांनी व्यक्त केली होती. पोलिसांचा तो अंदाज खरा ठरला आहे. मुंबईवरून पुण्याच्या दिशेने प्रवास करणाऱ्या पती- पत्नीचे काळभोर नगर परिसरात येताच वाद झाले. पत्नीने स्कार्पियोमधून उतरून रागात पुढे चालायला लागली. महिलेला स्कार्पिओ मधील सर्वजण विनवणी करत होते. मात्र महिला ऐकण्याच्या मनस्थितीत नव्हती. रात्रीची वेळ असल्याने महिलेला बळजबरीने उचलून स्कार्पिओ मध्ये बसवले, महिलेचा हा दुसरा विवाह असून त्यांना एक मुलगा देखील आहे. त्यामुळे ते अपहरण नसल्याचे सत्य समोर आले आहे. त्यामुळे पोलीसांनी सुटकेचा निश्वास सोडला आहे.

पोलीस उपायुक्त स्वप्न गोरे, सहाय्यक पोलीस आयुक्त विशाल हिरे यांच्या मार्गदर्शनाखाली गुन्हे शाखा, पिंपरी पोलिसांनी तपास केला. या घटनेमुळे पिंपरी- चिंचवड पोलिसांची चांगलीच धावपळ उडाली होती. पण आता सत्य समोर आले आहे.