पुण्यात भाजपच्या माजी नगरसेविकेच्या मुलाचा तरुणीवर बलात्कार

पुणे – पुण्यातून एक धक्कादायक घटना समोर आली आहे. भारतीय जनता पार्टीच्या माजी नगरसेविकेच्या मुलाने एका तरुणीसोबत प्रेमसंबंध जुळवून तिला लग्नाचे आमिष दाखवून लैंगिक अत्याचार केला आहे.

करण दिलीप नवले असे गुन्हा दाखल करण्यात आलेल्या तरुणाचे नाव आहे. तो भारतीय जनता पार्टीच्या माजी नगरसेविका राजश्री नवले यांचा मुलगा आहे. पोलिसांनी दिलेल्या माहितीनुसार, पीडित तरुणीचा एक व्यवसाय असून ती आंबेगाव परिसरात राहण्यास आहे. तिची आणि करणची एका जीममध्ये ओळख झाली होती. त्यानंतर त्यांचे भेटणे बोलणे सुरू होते. त्यानंतर त्यांच्यात मैत्री आणि नंतर प्रेमात रूपांतर झाले. काही दिवसाने पीडितेने करणला लग्नाबाबत विचारणा केली असता त्याने टाळाटाळ करण्यास सुरुवात केली. तरुणीला करणचे इतर मुलींशी प्रेमसंबध असल्याचा संशय आल्याने तिने विचारणा केल्यानंतर त्यांच्यात वाद झाले. त्यानंतर त्याने तिला मारहाण केली. मारहाणीच्या त्रासाला कंटाळून तरुणीने घडलेला सर्व प्रकार त्याच्या आईला सांगितला. त्यावर त्याच्या आईने ‘तू माझ्या मुलाचे वाटोळे केले आहे, तुझ्यापर्यंत पोहचायला मला पाच मिनिटे लागणार नाहीत, तू या परिसरात राहायचे नाही, नाहीतर परिणाम वाईट होतील,’ अशी धमकी दिली. त्यानंतर करण पुन्हा एकदा तरुणीच्या संपर्कात होता. त्याने २०२१ ते २०२४ दरम्यान तिच्यावर अनेक वेळा बलात्कार केला होता. असाही दावा तरुणीने केला आहे. करणने तरुणी गर्भवती राहिल्यानंतर तिला गर्भपात करण्यासही भाग पाडले होते. या घटनेने राजकीय वर्तुळात एकच खळबळ उडाली आहे.

पोलिसांनी करणविरुद्ध भारतीय दंड संहितेच्या संबंधित कलमांतर्गत गुन्हा दाखल केला आहे. दरम्यान, १६ फेब्रुवारी २०२५ रोजी आळंदीत त्यांनी लग्न केल्याचे पीडितेने फिर्यादीत म्हटले आहे.