लाडकी बहिण योजनेमुळे राज्यात दारु महागणार

मुंबई – मुख्यमंत्री देवेंद्र फडणवीस यांच्या नेतृत्वाखाली राज्यात सुरू असलेले महायुती सरकार दारूचे दर वाढविण्याचा विचार करत आहे. दारूपासून महसूल कसा वाढवता येईल, याचा अभ्यास करण्यासाठी एक समितीही स्थापन करण्यात आली आहे.

विधानसभा निवडणुकीपूर्वी एकनाथ शिंदे यांच्या नेतृत्वाखालील महायुती सरकारने जनतेला अनेक लोकप्रतिनिधी आश्वासने दिली आहेत, ज्यांची अंमलबजावणी करण्यासाठी पैशांची गरज आहे. याची अंमलबजावणी केल्यास सरकारच्या तिजोरीवर मोठा भार पडणार आहे. हा भार कमी करण्यासाठी सरकार दारूवरील कर वाढवण्याच्या तयारीत आहे. दारूचे उत्पन्न कसे वाढवायचे याचा शोध घेण्यासाठी पाच सदस्यीय समिती स्थापन केली आहे. ही समिती दारू निर्मिती आणि विक्रीच्या शक्यतेचा अभ्यास करेल. गृहनिर्माण विभागाच्या अतिरिक्त सचिवांच्या अध्यक्षतेखाली ही समिती स्थापन करण्यात आली असून, त्यात वित्त विभागाचे अतिरिक्त मुख्य सचिव, राज्य उत्पादन शुल्क विभाग, राज्य जीएसटी आयुक्त आणि उत्पादन शुल्क आयुक्त हे समितीचे सदस्य असतील. या समितीला मद्य उत्पादन वाढवणे, नवीन दारू परवाने देणे आणि उत्पन्न वाढवण्याच्या इतर मार्गांचा अभ्यास करण्याचे काम देण्यात आले आहे. दरम्यान विधानसभा निवडणुकीत लाडकी बहीण योजनेचा हप्ता वाढवणे, शेतकऱ्यांची कर्जमाफी, मोफत वीज अशी अनेक आकर्षक आश्वासने देण्यात आली होती. यासाठी सरकारला पैशांची गरज आहे. हे पूर्ण करण्यासाठी सरकारच्या तिजोरीवर कोणताही अतिरिक्त बोजा पडू नये म्हणून भविष्यात दारूच्या किमती वाढवू शकतात. त्यामुळे लाडक्या बहिणीसाठी तळीरामांना झळ सोसावी लागणार आहे.

राज्य उत्पादन शुल्क विभागाला सन २०२४-२५ या आर्थिक वर्षात ३० हजार ५०० कोटींच्या महसुलाचे उद्दिष्ट देण्यात आल्यामुळे राज्यात मद्याचे दर वाढण्याची दाट शक्यता आहे. उत्पादन वाढीसाठी चांगल्या पद्धती आणि धोरणांचा अभ्यास करण्यास समितीला २ महिन्यांची मुदत देण्यात आली आहे.