संतापजनक! प्रियकरासाठी आईने केली पोटच्या मुलाची निर्घृण हत्या

अमरावती – मरावतीमध्ये आईने प्रियकराच्या मदतीने आपल्या पोटच्या मुलाची हत्या केल्याची भयंकर घटना समोर आली आहे. प्रेमसंबंधात अडसर ठरत असल्यामुळे आईने हे संतापजनक कृत्य केले. याप्रकरणात दत्तापूर पोलिसांनी तपासचक्राला गती देत चार मारेकऱ्यांना अटक करण्यात यश मिळविले.

गणेश उर्फ शुभम गजानन वारंगणे असे मृताचे नाव आहे. दत्तापूर येथील मनोज कीर्तन, मृताची आई दुर्गा गजानन वारंगणे, अमोल सुरेश अर्जुने व अशोक उर्फ चिवडा व्यकंटराव चवरे अशी अटक आरोपींची नावे आहेत. गणेश उर्फ शुभम वारंगणे याची आई दुर्गा हिचे मनोज कीर्तने याच्यासोबत प्रेमसंबध होते. या प्रेमसंबंधाची कुणकुण गणेशला लागली होती. त्यामुळे तो त्याच्या आईला हटकत होता. मुलगा गणेश हा आपल्या प्रेमसंबंधात अडसर ठरत असल्याने मनोज कीर्तन व दुर्गाने त्याचा काटा काढण्याचा निर्णय घेतला. या कटात अमोल सुरेश अर्जुने आणि अशोक ऊर्फ चिवडा व्यंकटराव चवरे या दोघांचा सहभाग होता.दिनांक ०७ ऑक्टोबर रोजी सकाळी सुमारे १० वाजता आरोपी मनोज किर्तनेने शुभमला मोटारसायकलवर बसवून नेले आणि आसेगाव शेतशिवारातील शितल गुप्ता यांच्या शेतातील पडीत ठिकाणी घेऊन गेला. तेथे चौघांनी मिळून शुभमचे हातपाय दोरीने बांधून त्यास निर्दयपणे मारहाण केली. यात तो गंभीर जखमी झाला. त्याला गंभीर अवस्थेत धामणगाव रेल्वे येथील ग्रामीण रूग्णालयात दाखल करण्यात आले. तपासणीअंती डॉक्टरांनी त्याला मृत घोषित केले. तसेच डॉ. आकाश येंडे यांनी याबाबतची माहिती दत्तापूर पोलिसाना दिली. तपास सुरू केल्यावर पोलिसांना धक्कादायक माहिती मिळाली. फक्त चार तासांतच पोलिसांनी दुर्गा, तिचा प्रियकर मनोज, तसेच इतर दोन साथीदार अमोल अर्जुने आणि अशोक चवरे यांचा छडा लावून त्यांना अटक केली. आरोपींना अटक करताच चौकशी केली गेली आणि त्यांनी गुन्ह्याची कबुली दिली.

याकारवाईत दत्तापूरचे पोलीस निरीक्षक गिरीश ताथोड, सहायक पोलीस निरीक्षक गजानन गजभारे, पोलीस उपनिरीक्षक पुंडलिक चव्हाण, पोलीस कर्मचारी अतूल पाटील, हरिहर वैद्य, दीपक पंधरे, सागर कदम, नवनाथ खेडकर, पवन हजारे, किरण पवार, निलीमा खडसे, मयुर ढवक, पीयूष चौबे यांचा समावेश होता.