संभाजी बिग्रेडच्या प्रविण गायकवाड यांच्यावर शाई ओतत मारहाण

अक्कलकोट – संभाजी ब्रिगेडचे प्रदेशाध्यक्ष प्रवीण गायकवाड यांच्या अंगावर अक्कलकोट येथे आज शाई ओतण्यात आली आहे. शिवधर्म फाउंडेशन आणि शिवभक्त यांच्याकडून गायकवाड यांच्या अंगावर शाई ओतण्यात आली आहे. यामुळे खळबळ आणि गोंधळाची परिस्थिती निर्माण झाली आहे.

प्रवीण गायकवाड हे संभाजी ब्रिगडचे प्रदेशाध्यक्ष असून ते आज अक्कलकोट येथे फत्तेसिंह शिक्षण संस्था आणि सकल मराठा समाजाच्या कार्यक्रमासाठी आले होते. यावेळी हा प्रकार घडला. प्रवीण गायकवाड यांनी संभाजी ब्रिगेड या आपल्या संघटनेच्या नावामध्ये छत्रपती संभाजी महाराजांचा एकेरी उल्लेख केल्यामुळे शिवधर्म फाउंडेशनचे कार्यकर्ते आक्रमक होते.  तसेच स्वामी समर्थांचा अपमान केल्याचा रागही त्यांच्या मनात होता. यापूर्वी देखील शिवधर्म फाउंडेशनने गायकवाड व संभाजी ब्रिगेडच्या विरोधात उपोषण केले होते. आज त्‍यांच्या डोक्‍यावर शाई ओतली. शिवधर्म फाउंडेशनचे अध्यक्ष दीपक काटे आणि त्यांच्या कार्यकर्त्यांनी ही शाईफेक केल्याची माहिती असून पोलिसांनी शाईफेक करणाऱ्यांना ताब्यात घेतलं आहे. शिवधर्म फाऊंडेशनच्या कार्यकर्त्यांनी काळं फासल्यानंतर प्रवीण गायकवाड हे कारमध्ये जाऊन बसले. पण शिवधर्म फाऊंडेशनचे कार्यकर्ते आक्रमक झाले होते. त्यांनी कारमध्ये घुसून गायकवाड यांना मारहाण केली. त्यानंतर रस्त्यावरही त्यांना मारहाण झाल्याचे समोर आले. दरम्यान प्रवीण गायकवाड हे संभाजी ब्रिगेडचे संस्थापक अध्यक्ष आहेत. एकूण दोन संभाजी ब्रिगेड आहेत. गायकवाड हे दुसऱ्या संभाजी ब्रिगेडचे अध्यक्ष आहेत. याचा व्हिडीओ सध्या व्हायरल होत आहे.

अक्कलकोट मध्ये प्रवीण गायकवाड यांचा सत्कार समारंभ आयोजित करण्यात आला होता. त्यावेळी त्यांना काळं फासण्यात आलं. हे प्रकरण घडल्यानंतर अद्याप प्रवीण गायकवाड यांनी कोणताही प्रतिक्रिया दिलेली नाही. पण यामुळे आगामी काळात वाद प्रतिवाद होण्याची शक्यता वर्तवली जात आहे.