बीड अपघाताचा अंगावर शहारे आणणारा व्हिडीओ समोर

बीड – बीडच्या गढी परिसरात सोमवारी रात्री उशिरा घडलेल्या भीषण अपघातात गेवराई येथील सहा जणांचा जागीच मृत्यू झाला. घटना गढी येथील छत्रपती संभाजी महाराज चौकाजवळ घडली आहे. या अपघाताचे सीसीटीव्ही फुटेजही समोर आले आहे. ज्यामध्ये सुसाट ट्रक या तरुणांना चिरडून निघून गेल्याचे दिसत आहे.

मिळालेल्या माहितीनुसार, बीड जिल्ह्यातून जाणाऱ्या धुळे सोलापूर राष्ट्रीय महामार्गावरील गढी पुलावर भीषण अपघात झाला. गेवराई शहराच्या जवळ असलेल्या गढी पुलावर एका एसयूव्ही वाहन डिव्हायडरवर धडकल्याने किरकोल अपघात झाला होता. त्यात कोणालाही दुखापत झाली नाही, कोणी जखमी झालं नाही. मात्र ती एसयूव्ही डिव्हायडरला धडकून तिथेच अडकल्याने ती बाहेर काढण्यासाठी गाडीत बसलेले सर्व बाहेर आले. मात्र ते रस्यावर उतरून उभे असताना त्याच महामार्गावरून जाणारा एक ट्रक भरधाव वेगाने आला आणि त्याने उभ्या असलेल्या लोकांना जोरदार धडक दिल्याने ते खाली कोसळले आणि चिरडले गेले. हा अपघात एवढा भीषण होता की ट्रकखाली चिरडल्या गेलेल्या सर्वांचाच मृत्यू झाला. गाडीचा अक्षरशः चक्काचूर झाला आणि घटनास्थळावर जिकडे तिकडे रक्तच पाहायला मिळत होते. घटनेची माहिती मिळताच स्थानिक पोलीस आणि आपत्कालीन पथक घटनास्थळी पोहोचले. त्यानंतर त्यांनी मृतदेहांना शवविच्छेदनासाठी स्थानिक रुग्णालयात हलविण्यात आले. बाळू आतकरे, मनोज करांडे, कृष्णा जाधव, दीपक सरोया, भागवत परळकर आणि सचिन ननवरे अशी मृतांची नावे आहेत. तर एक व्यक्ती गंभीर जखमी झाली असून त्यांच्यावर नजीकच्या रुग्णलयात उपचार सुरू आहेत. अपघाताचा व्हिडिओ समोर आला असून सगळा प्रसंग अंगावर शहारे आणणारा आहे.

अपघातानंतर ट्रक चालक फरार झाला. घटनेची माहिती मिळताच पोलीसांनी तत्काळ धाव घेत पंचनामा केला तसेच जखमीला तातडीने रुग्णालयात दाखल करण्यात आले. फरार ट्रकचालकाचा पोलिसांकडून कसून शोध घेण्यात येत आहे.