माजी नगरसेवकाच्या कार्यालयावर तलवार घेऊन प्राणघातक हल्ला

अंबरनाथ – अंबरनाथमधील भाजपाचे माजी नगरसेवक रोहित राजू महाडिक यांच्या ऑफिसवर अज्ञात हल्लेखोरांनी शनिवारी रात्री तलवारी घेऊन हल्ला केला. यामध्ये ऑफिसचे मोठे नुकसान झाले असून ऑफिसमध्ये काम करणाऱ्या एका कर्मचाऱ्यावर देखील तलवारीने हल्ला करण्यात आला आहे.

अंबरनाथमधील भाजपाचे माजी नगरसेवक रोहित राजू महाडिक यांचे अंबरनाथ पूर्वेच्या बी केबिन रोडवरील स्वानंद शॉपिंग कॉम्प्लेक्स शेजारी कार्यालय आहे. या कार्यालयात शनिवारी रात्री पावणे अकरा वाजताच्या सुमारास हा प्रकार घडला. अचानक तोंडाला रुमाल बांधलेले आणि हातात तलवारी घेतलेले १० ते १२ हल्लेखोर आले. त्यांनी ऑफिसच्या काचा तलवारीने फोडत ऑफिसमध्ये घुसून ऑफिसमध्ये काम करणाऱ्या तरुणावर देखील तलवारीने हल्ला चढवला. तसेच ऑफिसमधील खुर्च्यांचीही तलवारीने वार करत नासधूस केली. या संपूर्ण हल्ल्याचा प्रकार सीसीटीव्ही कॅमेऱ्यात कैद झाला. अवघ्या २३ सेकंदात हल्ला करून हल्लेखोर घटनास्थळावरून पसार झाले. याप्रकरणी शिवाजीनगर पोलीस ठाण्यात रात्री उशिरा गुन्हा दाखल करण्यात आला. सध्या पोलीस हल्लेखोरांचा शोध घेत आहेत. या घटनेची माहिती मिळताच शिवाजीनगर पोलिसांनी तातडीने घटनास्थळी धाव घेत पाहणी केली आहे. याबद्दल रोहित महाडिक म्हणाले, “१० ते १२ जण हल्लेखोर तलवारी, चॉपर घेऊन आले. ऑफिसच्या काचा पहिल्यांदा फोडल्या. मग, कार्यालयातील कर्मचारी बाहेर बसलेला, तो धावून कार्यालयात आला. कार्यालयात आल्यावर एक ठिकाणी उभा राहिला तर त्याच्यावर तब्बल १६ वेळा तलवारीने हल्ला करण्यात आला. पण, सगळे हल्ले त्याने खुर्चीवर झेलल्याने तो वाचला पण हा मला मारण्याचा प्रयत्न असण्याची शक्यता आहे. त्यामुळे पोलीसांनी आरोपींना तातडीने अटक करावी अशी मागणी केली आहे. दरम्यान या घटनेने अंबरनाथ शहराच्या राजकीय वर्तुळात एक खळबळ उडाली आहे.

पोलिसांनी परिसरातील सीसीटीव्ही फुटेज तपासण्यास सुरुवात केली असून हल्लेखोर कोणत्या मार्गाने पसार झाले याचा शोध घेतला जात आहे. पोलिसांकडून आरोपींच्या शोधासाठी चार पथके तैनात करण्यात आली आहेत.