बेकायदेशीर बाळगलेली पिस्तूल हाताळताना झालेल्या गोळीबारात एकजण जखमी झाल्याची घटना सिंहगड रोडवरील वडगाव बुद्रुक परिसरात घडली. ही घटना आज (गुरुवारी) सकाळी घडली आहे. या घटनेत एकाच्या पायाला गोळी लागल्याने तो जखमी झाला आहे. जखमीला तातडीने खासगी रुग्णालयात उपचारासाठी दाखल केले आहे.
वडगाव बुद्रुक परिसरात चरवड वस्तीत एका किरणा माल दुकानदारान बेकायदा देशी बनावटीचे पिस्टल बाळगले. गुरुवारी सकाळी पावणे आठच्या सुमारास किराणा माल दुकानदार पिस्तूल मित्राला दाखवत होते. पिस्तूल हाताळत असताना चाप ओढला गेल्याने गोळी सुटली आणि गोळी मित्राच्या पायाला चाटून गेली. ही घटना सकाळी पावणे आठच्या सुमारास घडली आहे.
गोळीबार झाल्याची माहिती मिळताच सिंहगड रोड पोलीस ठाण्याचे वरिष्ठ पोलीस निरीक्षक विजय कुंभारयांच्यासह पथकाने घटनास्थळी धाव घेतली. वरिष्ठ अधिकाऱ्यांनी घटनास्थळी पाहणी केली. गोळीबारात एकाच्या पायाला गोळी चाटून गेली आहे. ही घटना नेमकी कशी घडली, याची माहिती घेण्याचे काम सुरु असल्याची माहिती विजय कुंभार यांनी दिली.
