महाराष्ट्रात २३ जानेवारीला होणार राजकीय भूकंप?

मुंबई – राष्ट्रवादी काँग्रेस शरदचंद्र पवार पक्षाचे माळशिरसचे आमदार उत्तम जानकर यांनी विधानसभेच्या निवडणुकीनंतर ईव्हीएमचा मुद्दा अनेकदा उपस्थित करत अनेक धक्कादायक दावे केले होते. तसेच उत्तम जानकर यांनी आंदोलनाचाही इशारा दिला होता. पण आता उत्तम जानकर यांनी मोठी घोषणा केली आहे. त्यामुळे खळबळ उडाली आहे.

आमदार उत्तम जानकर आमदारकीचा राजीनामा देणार आहेत. उत्तम जानकर हे निवडणूक आयोगाकडे राजीनामा सोपवणार आहेत. काही दिवसांपूर्वी मारकडवाडी प्रकरणी जानकरांवर गुन्हा दाखल करण्यात आला होता. त्यानंतर आता बॅलेट पेपरवर मतदान घेण्याच्या मागणीसाठी जानकर यांनी मोठे पाऊल उचलले आहे. तसेच दिल्लीतील जंतर मंतरवर आंदोलनाचा इशारा देखील त्यांनी दिला आहे. जानकर म्हणाले की, ईव्हीएमच्या मुद्याला मारकडवाडीत गावातून सुरुवात झाली आणि तोच आक्रोश संपूर्ण माळशिरस तालुक्यात आहे. आता माळशिरस तालुक्यातील धानोरे या गावात देखील ग्रामसभेचं आयोजन करण्यात आलं होतं. त्या ठिकाणी १२०६ लोकांनी हात वरती करून मतदान केलं. पण त्या गावात मला ९६३ एवढेच मते दाखवण्यात आलेली आहेत. आता धानोरे गावातील १२०० लोकांनी प्रतिज्ञापत्र दिले आहेत आणि धानोरे गावातील मतदानाची पडताळणी करण्याची मागणी केली आहे. आता जर निवडणूक आयोग मतदानाची पडताळणी करणार नसेल तर २३ जानेवारी रोजी मी आमदारकीचा राजीनामा देणार आहे”, असं उत्तम जानकर यांनी म्हटले आहे. तसेच माळशिरस मतदारसंघात बॅलेट पेपरवर पोटनिवडणूक घेण्यात यावी अन्यथा आम्ही दिल्लीतील जंतरमंतरवर आंदोलन करणार असल्याचंही जानकर यांनी म्हटले आहे. दरम्यान शरद पवारांचा आमदार थेट राजीनामा देणार असल्याने राजकारणात एकच खळबळ उडाली आहे.

विधानसभा निवडणुकीत महायुतीने नेत्रदीपक यश मिळवलं. मात्र या यशानंतर महाविकास आघाडीने ईव्हीएमवर शंका उपस्थित केली. माळशिरस तालुक्यातील मारकडवाडी येथील आंदोलनाची तर राज्यभरात चर्चा झाली होती. जानकर यांच्या या पवित्र्यामुळे ईव्हीएमचा मुद्दा पुन्हा एकदा ऐरणीवर येणाऱ असल्याचे दिसत आहे.