किरकोळ वादातून भररस्त्यात चाकूने भोसकून खून

नंदुरबार – किरकोळ वादातून मार्केट परिसरात भररस्त्यावर चाकूने हल्ला करण्यात आल्याची घटना नंदुरबार शहरात घडली होती. या घटनेतील तरुणाचा उपचारादरम्यान मृत्यू झाला असून त्यामुळे शहरात खळबळ उडाली आहे. या हत्येचा व्हिडिओ व्हायरल झाला आहे.

जय वळवी असे हत्या करण्यात आलेल्या युवकाचे नाव आहे. भैय्या मराठे नामक युवकाने त्याच्यावर चाकुने प्राणघातक हल्ला केला होता. नंदुरबार शहरातील मार्केट परिसरात मंगळवारी सायंकाळी जय आलेला होता. त्यावेळी मराठे देखील तिथे उपस्थित होता. जय आपल्या गाडीकडे जात असताना मराठे यांनी धावत जात आपल्या गाडीतील चाकु काढला आणि जयकडे जात त्याच्यावर प्राणघातक हल्ला केला. या हल्ल्यानंतर जयला खाजगी रुग्णालायत उपचारासाठी दाखल करण्यात आले होते. पण त्याची प्रकृती गंभीर झाल्याने त्याला उपचारासाठी सुरत येथे हलविण्यात आले होते. पण तिथे उपचार सुरू असताना मृत्यू झाला. दरम्यान चाकू हल्ल्याची ही संपूर्ण घटना सीसीटीव्ही कॅमेरात कैदी झाली आहे. पोलीसांनी या हल्यातील मुख्य आरोपी भैय्या मराठे याला ताब्यात घेतले आहे. पण ही हत्या का करण्यात आली, याचे कारण अद्याप समोर आलेले नाही. पण या घटनेमुळे शहरात मोठी खळबळ उडाली आहे.

जय वळवीच्या मृत्यूमुळे शहरात तणावाचे वातावरण निर्माण झाले असून व्यापाऱ्यांनी स्वतःहून दुकाने बंद ठेवली आहेत. खबरदारीचा उपाय म्हणून शहरातील शाळाही बंद ठेवण्यात आल्या आहेत. कुठलाही अनुचित प्रकार घडू नये; यासाठी पोलिसांचा मोठा बंदोबस्त तैनात करण्यात आला आहे.