नवीन आर्थिक वर्षाची सुरुवात म्हणजेच 1 एप्रिल हा दिवस केवळ कॅलेंडर बदलण्यापुरता मर्यादित नसेल. कारण या दिवसापासून तुमच्या दैनंदिन आयुष्यावर परिणाम करणारे मोठे बदल होणार आहेत.
पगार, इनकम टॅक्स, बँक, पास्टॅगसह अनेक महत्त्वाच्या आर्थिक नियमांमध्ये 1 एप्रिलपासून बदल होणार आहेत. बँकिंग, करप्रणाली आणि डिजिटल व्यवहारांशी संबंधित काही मोठे निर्णय लागू बुधवारपासून लागू होत आहेत. याचा थेट परिणाम सामान्य नागरिकांवर होणार आहे. त्यामुळे या बदलांची माहिती आधीच जाणून घेणं अत्यंत गरजेचं आहे.
भारतीय राष्ट्रीय महामार्ग प्राधिकरणाने 2026-27 या आर्थिक वर्षासाठी FASTag वार्षिक पासच्या शुल्कात वाढ करण्याचा निर्णय घेतला आहे. नवीन दर 1 एप्रिल 2026 पासून लागू होणार आहेत. त्यामुळे महामार्गावर प्रवास करणाऱ्या वाहनधारकांना आता अधिक खर्च करावा लागू शकतो.
नॅशनल पेमेंट कॉर्पोरेशन ऑफ इंडियाने RuPay डेबिट कार्डधारकांसाठी लाउंज अॅक्सेसच्या नियमांमध्ये बदल जाहीर केले आहेत. 1 एप्रिल 2026 पासून विमानतळ आणि रेल्वे लाउंजमध्ये प्रवेश करण्याची पद्धत बदलणार असून काही मर्यादा लागू होण्याची शक्यता आहे.
1 एप्रिल 2026 पासून PAN कार्डसाठी अर्ज करताना केवळ आधार कार्ड पुरेसे राहणार नाही. अतिरिक्त कागदपत्रांची आवश्यकता भासणार आहे. याशिवाय, PAN कार्डवरील नाव हे आधार कार्डप्रमाणेच असणे बंधनकारक असेल. त्यामुळे अर्जदारांनी आधारवरील माहिती अचूक असल्याची खात्री करून घ्यावी.
HDFC Bank सह काही प्रमुख बँकांनी कर्जदर, FD व्याजदर, ATM व्यवहार आणि लॉकर शुल्कांमध्ये बदल जाहीर केले आहेत. काही बदल आधीच लागू झाले असून उर्वरित 1 एप्रिल 2026 पासून प्रभावी होतील.
पंजाब नॅशनल बँक आणि बंधन बँक यांसह अनेक बँकांनी ATM मधून पैसे काढण्याच्या नियमांमध्ये बदल केले आहेत. यात व्यवहार मर्यादा, शुल्क आणि वापराच्या अटींमध्ये सुधारणा करण्यात आली आहे.
भारतीय रिझर्व्ह बँकेच्या नियमानुसार, सर्व डिजिटल व्यवहारांसाठी 2-फॅक्टर ऑथेंटिकेशन अनिवार्य राहणार आहे. OTP आधारित सुरक्षा प्रणालीचा वापर मोठ्या प्रमाणावर सुरूच राहणार असून हे नियम 1 एप्रिल 2026 पासून अधिक काटेकोरपणे लागू केले जातील.
