राँग साईडने जाणाऱ्या बीएमडब्ल्यू कारने स्कूटरला दिली धडक ; स्कूटरवरील दोन तरुणीचा जागीच मृत्यू , व्हिडिओ समोर

चुकीच्या दिशेने जाणाऱ्या एका बीएमडब्ल्यू कारने जोरात स्कूटरला धडक दिली. या भीषण घटनेत स्कूटरवरील दोन तरुणीचा जागीच मृत्यू झाला. आरोपी मित्राच्या वाढदिवसाचा केक घेऊन बीएमडब्ल्यू कारमधून जात होता. राँग साईडने वेगात जात असताना आरोपीने समोरून येणाऱ्या तरुणींच्या स्कूटरला जोरात धडक दिली. दोघी उडून दूर पडल्या आणि ठार झाल्या. इंदूर शहरातील खजराना परिसरात हा अपघात झाला.

पोलिसांनी दिलेल्या माहितीनुसार, मृत तरुणींची ओळख पटली असून, दीक्षा जादौन (वय २५ वर्ष) आणि लक्ष्मी तोमर (वय २४ वर्ष) अशी त्यांची नावे आहेत. त्या इंदूरमधील तुलसीनगरमध्ये राहत होत्या. पोलिसांनी दिलेल्या माहितीनुसार, इंदूरमधील खजराना परिसरात १४ सप्टेंबर रोजी रात्री साडे अकरा वाजताच्या सुमारास ही घटना घडली. दोन्ही तरुणी गणेश मंदिर परिसरातील यात्रेतून घरी जात होत्या. स्कूटरवरून जात असताना चुकीच्या दिशेने वेगात येणाऱ्या बीएमडब्ल्यू कारने त्यांना उडवले. अपघातानंतर परिसरात असलेल्या लोकांनी त्यांना रुग्णालयात नेले. डॉक्टरांनी त्यांना मृत घोषित केले.