मित्राला सोडायला जाणं तरुणाच्या जीवाशी बेतलं! अज्ञात वाहनाच्या धडकेत हुंडाई कारचा विचित्र अपघात ; २ जण ठार, १ जखमी

याबाबत अधिक माहिती अशी की, नगर मनमाड महामार्गावर पहाटेच्या सुमारास आंबेवाडी शिवारात हुंडाई कारचा विचित्र अपघात झाला. मित्राला मनमाड रेल्वे स्थानक येथे सोडवण्यासाठी जात असताना आंबेवाडी शिवारात हुंडाई कारला पाठीमागून अज्ञात वाहनाने धडक दिली. ही धडक इतकी जोरदार होती की कार रस्त्याच्या तीस ते चाळीस फूट बाजूला हवेत फेकली गेली, त्यामुळे कारचा अक्षरशः चुराडा झाला. या अपघातात कारच्या पाठीमागे बसलेले दोघेजण जागीच ठार झाले आहेत व चालक गंभीर जखमी झाला आहे. आकाश रमेश पवार व निलेश दगु शेवाळे असे ठार झालेल्या व्यक्तींची नाव आहेत. तर शुभम गंगाधर पानमळे असे जखमी चालकाचे नाव आहे.

अपघातातील मृत आणि जखमी तरुण येवला तालुक्यातील सावरगावचे राहणारे आहेत. अपघातात इतका भीषण होता की चुराडा झालेल्या कारमधून दोन्ही मृतदेह पत्रा कापून बाहेर काढावे लागले आहेत. दरम्यान, या घटनेची माहिती कळताच स्थानिकांनी घटनास्थळी धाव घेत मदतकार्य केले. तसेच खाजगी रुग्णवाहिकेद्वारे दोन्ही मृतदेह उपजिल्हा रुग्णालय येवला येथे आणण्यात आले असून जखमी चालकावर उपजिल्हा रुग्णालयात उपचार सुरू आहेत. या अपघाताचा तपास पोलीस करत आहे.