मुंबईची लाईफलाईन समजली जाणारी लोकल ट्रेन आणि तिची गर्दी तुम्हाला माहितीच आहे. पण आता नव्याने मुंबईकरांच्या सेवेत आलेली मेट्रो फक्त प्रवाशांची ने-आण करण्यापुरती मर्यादित राहिलेली नाही, हे तुम्हाला माहितीये का?होय, आता मेट्रो चक्क कमाईची नवी मशीन बनत आहे. नुकत्याच समोर आलेल्या एका माहितीने सर्वांनाच आश्चर्याचा धक्का दिला आहे.MMRDA ने नुकतंच Mumbai Metro Line 2B वर पहिल्या व्यावसायिक जाहिरातीचं शूटिंग यशस्वीरीत्या पूर्ण केलं. मंडाले मेट्रो स्टेशन आणि धावत्या ट्रेनमध्ये लाइट्स, कॅमेरा आणि ॲक्शनचा थरार रंगला. या एकाच प्रोजेक्टमधून प्रशासनाच्या तिजोरीत तब्बल ₹२०.३५ लाख (GST सहित) जमा झाले आहेत. हा आकडा नक्कीच डोळे विस्फारणारा आहे.
नेहमी फक्त तिकीट विक्रीवर अवलंबून न राहता इतर मार्गांनी उत्पन्न वाढवण्यावर प्रशासनाने आता मोठा भर दिला आहे. एमएमआरडीएच्या नव्या धोरणांतर्गत मेट्रो स्टेशन आणि ट्रेन आता जाहिरातदार आणि चित्रपट निर्मात्यांसाठी खुली करण्यात आली आहेत. विशेष म्हणजे, गेल्या वर्षात याच बिगर-तिकीट महसुलातून मेट्रोने तब्बल ₹८१ कोटींची भरभक्कम कमाई केली होती. प्रशासनाचा हा निर्णय चांगलाच फायद्याचा ठरतोय.या कमाईची आकडेवारी पाहिली तर चित्र अधिक स्पष्ट होतं. २०२४-२५ या आर्थिक वर्षात शूटिंगमधून २०.४१ लाख मिळाले होते. त्यानंतर २०२५-२६ मध्ये हा आकडा २५.९६ लाखांवर गेला. आता चालू वर्षात एकाच शूटिंगमधून २०.३५ लाखांचा महसूल मिळाला आहे. याशिवाय स्थानकांवरील जाहिराती, ईव्ही चार्जिंग आणि टेलिकॉम सेवेतूनही कोट्यवधी रुपये उभे राहत आहेत.
या नव्या यशस्वी प्रयोगामुळे मनोरंजन विश्वातही चांगलीच खळबळ उडाली आहे. एमएमआरडीएचे महानगर आयुक्त डॉ. संजय मुखर्जी यांनी स्पष्ट केलंय की मेट्रोला आता बहुआयामी मालमत्ता म्हणून विकसित केलं जात आहे. प्रवाशांच्या रोजच्या प्रवासात कोणताही अडथळा न आणता यापुढेही चित्रपट दिग्दर्शक आणि कंटेंट क्रिएटर्सना शूटिंगसाठी आमंत्रित केलं जाणार आहे. थोडक्यात सांगायचं तर, आपली मुंबई मेट्रो आता फक्त प्रवासाचं साधन न राहता क्रिएटिव्हिटी आणि बंपर कमाईचं नवं केंद्र बनत आहे.
