भाविकांच्या श्रद्धेशी खेळ! स्वस्त हज यात्रेचे आमिष दाखवून ८० जणांना कोट्यवधींचा गंडा; ट्रॅव्हल्स एजन्सीवर गुन्हा

पुणे:हज आणि उमराह यात्रेला जाण्याचे स्वप्न पाहणाऱ्या निष्पाप मुस्लिम भाविकांची मोठी आर्थिक फसवणूक झाल्याचा धक्कादायक प्रकार समोर आला आहे. अत्यंत कमी पैशात आणि स्वस्त पॅकेजमध्ये हज व उमराह यात्रा करून देण्याचे आमिष दाखवून ‘अल खलीफा टुर्स अँड ट्रॅव्हल्स’च्या संचालकांनी तब्बल ८० हून अधिक भाविकांना कोट्यवधी रुपयांचा गंडा घातला आहे. याप्रकरणी फसवणूक झालेल्या भाविकांनी पोलिसांत धाव घेतली असून, ट्रॅव्हल्स कंपनीच्या संचालकांविरोधात गुन्हा दाखल करण्यात आला आहे.मिळालेल्या माहितीनुसार, ‘अल खलीफा टुर्स अँड ट्रॅव्हल्स’  या एजन्सीने गेल्या काही महिन्यांत सोशल मीडिया आणि विविध माध्यमांतून ‘स्वस्त हज-उमराह यात्रा’ अशा आकर्षक जाहिराती प्रसिद्ध केल्या होत्या. या जाहिरातींना आणि एजन्सीच्या संचालकांनी दिलेल्या मोठ्या सवलतींच्या आश्वासनांना बळी पडून पुणे (कोंढवा परिसर) आणि आसपासच्या भागातील सुमारे ८० भाविकांनी यात्रेसाठी बुकिंग केले होते.

असा’ उघडकीस आला प्रकार
भाविकांनी दिलेल्या तक्रारीनुसार, ट्रॅव्हल्स संचालकांनी प्रत्येकाकडून आगाऊ रकमा आणि पासपोर्ट जमा करून घेतले होते. प्रवासाची तारीख जवळ आल्यानंतरही जेव्हा भाविकांना तिकिटे, व्हिसा आणि सौदी अरेबियातील हॉटेल बुकिंगचे कोणतेही तपशील मिळाले नाहीत, तेव्हा त्यांना संशय आला. भाविकांनी एजन्सीच्या कार्यालयात आणि संचालकांशी संपर्क साधण्याचा प्रयत्न केला असता, मुख्य संचालक आपली संपूर्ण फॅमिली घेऊन फरार झाल्याचे समोर आले. पैसे आणि हक्काचा पासपोर्ट दोन्हीही अडकल्याने हताश झालेल्या भाविकांनी अखेर पोलिसांत धाव घेत न्याय मागितला.

पोलिसांत गुन्हा दाखल, मुख्य आरोपी फरार
पीडित भाविकांच्या तक्रारीवरून पोलिसांनी ‘अल खलीफा टुर्स ट्रॅव्हल्स’च्या संचालकांवर फसवणूक  आणि गुन्हेगारी कट रचल्याप्रकरणी विविध कलमांखाली गुन्हा दाखल केला आहे. प्राथमिक अंदाजानुसार हा घोटाळा कोट्यवधी रुपयांच्या घरात असून, फसवणूक झालेल्या भाविकांचा आकडा आणखी वाढण्याची शक्यता पोलिसांनी वर्तवली आहे. सध्या पोलीस आरोपींच्या बँक खात्यांचा आणि त्यांच्या ठावठिकाण्याचा शोध घेत आहेत.

सायबर आणि ट्रॅव्हल तज्ज्ञांचा भाविकांना महत्वाचा सल्ला:
धार्मिक यात्रांच्या नावाखाली होणाऱ्या अशा फसवणुकीच्या घटनांमध्ये मोठी वाढ झाली आहे. त्यामुळे भाविकांनी खालील गोष्टींची काळजी घेणे गरजेचे आहे.अधिकृत नोंदणी तपासा: हज किंवा उमराह बुकिंग करताना संबंधित ट्रॅव्हल्स एजन्सी भारत सरकारच्या ‘अल्पसंख्याक मंत्रालय’ किंवा अधिकृत हज कमिटीकडे नोंदणीकृत आहे का, याची खात्री करा.अवाजवी सवलतींना बळी पडू नका: बाजारातील दरापेक्षा अत्यंत कमी किंवा अर्ध्या किमतीत यात्रा करून देण्याचे दावे करणाऱ्या एजंट्सपासून दूर राहा. रमझान किंवा हज काळात मूळ खर्च जास्त असतो, त्यामुळे ‘स्वस्त ऑफर’ ही फसवणुकीची पहिली पायरी असू शकते.अल्पकालीन व्हिसा फसवणूक: अनेक ट्रॅव्हल्स एजंट सामान्य ‘टूरिस्ट व्हिसा’वर हज यात्रा घडवून आणण्याचे खोटे आश्वासन देतात. सौदी अरेबियाच्या नियमांनुसार, अधिकृत ‘हज व्हिसा’ किंवा वैध परमिटशिवाय हज केल्यास मोठा दंड आणि थेट मायदेशी हद्दपारी होऊ शकते.डिजिटल पुरावे ठेवा: पैसे देताना नेहमी बँक ट्रान्सफर किंवा चेकचा वापर करा आणि प्रत्येक पावती जपून ठेवा.