शिक्षण क्षेत्राला काळीमा! दहावीच्या बोर्ड परीक्षेत मुख्याध्यापकाचेच ‘पुरवणी कांड’; सिंधुदुर्गातील धक्कादायक प्रकार

राज्य शासनाच्या ‘कॉपीमुक्त परीक्षा’ अभियानाला मोठा धक्का देणारी घटना सिंधुदुर्ग जिल्ह्यातील वैभववाडी तालुक्यात समोर आली आहे. मार्च २०२६ मध्ये झालेल्या दहावीच्या बोर्ड परीक्षेत एका विद्यार्थ्याची पुरवणी उत्तरपत्रिका चक्क एका शिक्षकानेच लिहून दिल्याचे प्राथमिक चौकशीत स्पष्ट झाले आहे. या गंभीर गैरप्रकारात एका मुख्याध्यापकाचाही सहभाग असल्याचे समोर आल्याने संपूर्ण कोकणात आणि शैक्षणिक वर्तुळात मोठी खळबळ उडाली आहे.

या प्रकरणाची थेट दखल घेत कोकण विभागीय शिक्षण मंडळाने संबंधित विद्यार्थ्याचा निकाल राखून ठेवला असून दोषींवर गुन्हे दाखल करण्यासह कठोर कारवाईचे संकेत दिले आहेत. पेपर तपासणाऱ्या शिक्षकाच्या सतर्कतेमुळे ‘असे’ उघड झाले कांडहा संपूर्ण धक्कादायक प्रकार उत्तरपत्रिका मूल्यमापनाच्या प्रक्रियेदरम्यान उघडकीस आला.हस्ताक्षरातील तफावत: वैभववाडी तालुक्यातील एका केंद्रावरील पेपर तपासत असताना, परीक्षकाला विद्यार्थ्याच्या मूळ उत्तरपत्रिकेती हस्ताक्षर आणि त्याला जोडलेल्या पुरवणीतील हस्ताक्षर यामध्ये स्पष्ट फरक आढळला.

शिक्षकाची थेट तक्रार: या सतर्क शिक्षकाने तात्काळ याबाबत कोकण बोर्डाकडे अधिकृत तक्रार दाखल केली.
प्राथमिक चौकशीत तथ्य: कोकण बोर्डाने केलेल्या प्राथमिक चौकशीत या तक्रारीत तथ्य आढळल्यानंतर, सिंधुदुर्ग जिल्हा माध्यमिक शिक्षण विभागाला सखोल चौकशीचे आदेश देण्यात आले. या चौकशीत पुरवणी उत्तरपत्रिका शिक्षकानेच लिहिल्याचे सूत्रांकडून निश्चित झाले आहे.उपशिक्षणाधिकाऱ्यांमार्फत चौकशी; ‘हस्ताक्षर तज्ज्ञांची’ मदत घेणार

या संवेदनशील प्रकरणाची चौकशी आता अधिकृतपणे सुरू झाली आहे:
संजय माने यांच्यावर जबाबदारी: उपशिक्षणाधिकारी संजय माने यांच्याकडे या चौकशीची जबाबदारी सोपवण्यात आली आहे. त्यांनी संबंधित परीक्षा केंद्र, तेथील पर्यवेक्षक , उत्तरपत्रिका आणि संशयित शिक्षकांची माहिती गोळा करणे सुरू केले आहे.हस्ताक्षर तज्ज्ञांकडे तपासणी: प्रकरणाचे गांभीर्य लक्षात घेता, संशयास्पद उत्तरपत्रिका फॉरेन्सिक हस्ताक्षर तज्ज्ञांकडे पाठवण्याची दाट शक्यता आहे.

“दोषींवर कठोर कारवाई होईल” – राजेश क्षीरसागर (अध्यक्ष, कोकण बोर्ड)
या प्रकरणाबाबत कोकण बोर्डाचे अध्यक्ष राजेश क्षीरसागर यांनी अधिकृत भूमिका स्पष्ट करताना सांगितले:

“संबंधित विद्यार्थ्याची उत्तरपत्रिका एका शिक्षकानेच लिहिल्याचे प्राथमिक तपासात निश्चित झाले असून, इतर तांत्रिक बाबींची चौकशी सध्या सुरू आहे. संबंधित विद्यार्थ्याचा निकाल राखून ठेवण्यात आला आहे. या संपूर्ण गैरप्रकारात सामील असलेल्या दोषी शिक्षकासह संबंधित सर्वांवर अत्यंत कठोर कारवाई केली जाईल.”

‘कॉपीमुक्त अभियाना’वर प्रश्नचिन्ह?
यावर्षी दहावी-बारावीच्या परीक्षा पूर्णपणे पारदर्शक आणि कॉपीमुक्त वातावरणात पार पाडण्यासाठी राज्य शासन, बोर्ड आणि थेट मुख्यमंत्री स्तरावरून विशेष मोहीम राबवण्यात आली होती. ही मोहीम बऱ्याच अंशी यशस्वी ठरत असतानाच, विद्यार्थ्यांचे रक्षक असणारे शिक्षकच जर उत्तरपत्रिका लिहून देऊ लागले, तर या अभियानाच्या प्रभावीतेवर आणि परीक्षा केंद्रांच्या सुरक्षेवर आता मोठे प्रश्नचिन्ह निर्माण झाले आहे.