इबोलाची धास्ती! प्रभावित देशांतून येणाऱ्या प्रवाशांसाठी नवे नियम; विमानतळांवर कडक पाळत

आफ्रिकेतील काँगो, दक्षिण सुदान आणि युगांडा या देशांमध्ये इबोला आजाराच्या वाढत्या प्रादुर्भावामुळे केंद्र सरकारने देशभरात सतर्कतेचा इशारा दिला आहे. या पार्श्वभूमीवर, महाराष्ट्र सरकारने तातडीने पावले उचलत राज्यातील संपूर्ण आरोग्य यंत्रणेला ‘अलर्ट मोड’वर राहण्याचे आदेश दिले आहेत.सार्वजनिक आरोग्य विभागातील वरिष्ठ वैद्यकीय अधिकाऱ्यांनी बुधवारी ही माहिती दिली. राज्यातील ‘एकात्मिक रोग सर्वेक्षण कार्यक्रमांतर्गत’ आता इबोलासदृश लक्षणे असलेल्या संशयित रुग्णांवर कडक देखरेख आणि तपासणी केली जाणार आहे.

मुख्य मुद्दे: नेमकं काय घडलंय?
कारण: काँगो, दक्षिण सुदान आणि युगांडामध्ये इबोलाचा उद्रेक.
भारताची भूमिका: सर्व राज्ये आणि केंद्रशासित प्रदेशांना सतर्कतेचे निर्देश.
महत्त्वाची दिलासादायक बाब: नागरिकांनी घाबरून जाऊ नये. इबोला हा कोरोनासारखा हवेतून पसरत नाही.

महाराष्ट्र सरकारचा ‘ॲक्शन प्लॅन’: ४ मोठे निर्णय
संभाव्य धोका टाळण्यासाठी राज्य सरकार, जिल्हा प्रशासन आणि विमानतळ यंत्रणा यांच्यात समन्वय साधला जात असून खालील ४ प्रमुख आघाड्यांवर तयारी सुरू आहे:

विमानतळांवर कडक पाळत: परदेशातून येणाऱ्या प्रवाशांवर बारकाईने लक्ष ठेवले जात असून विमानतळ आरोग्य यंत्रणा आणि राज्य सर्वेक्षण विभाग एकमेकांच्या संपर्कात आहेत.

स्वतंत्र विलगीकरण कक्ष: सर्व शासकीय वैद्यकीय महाविद्यालये आणि जिल्हा रुग्णालयांना स्वतंत्र वॉर्ड तयार ठेवण्याच्या सूचना देण्यात आल्या आहेत.
विशेष रुग्णवाहिका: संशयित रुग्णांच्या वाहतुकीसाठी विशेष रुग्णवाहिका आणि प्रशिक्षित आरोग्य कर्मचारी तैनात केले जात आहेत.
आयसीयू आणि लॅब सज्जता: अतिदक्षता विभाग (ICU) आणि प्रयोगशाळा सुविधा कोणत्याही आपत्कालीन स्थितीसाठी तयार ठेवण्यात आल्या आहेत.

मुंबई महापालिकेचे डॉक्टरांना महत्त्वाचे निर्देश
मुंबई महापालिका प्रशासनाने पालिका रुग्णालयांमधील निवासी डॉक्टरांसाठी विशेष मार्गदर्शक सूचना जारी केल्या असून खालील नियमांचे पालन सक्तीचे केले आहे:

संसर्ग नियंत्रण: डॉक्टरांनी नियमित हात स्वच्छ धुणे आणि सार्वत्रिक प्रतिबंधक उपायांचा (PPE/मास्क) वापर करणे आवश्यक.
कचरा व्यवस्थापन: संशयित रुग्णांच्या संपर्कात आलेल्या बायोमेडिकल कचऱ्याची नियमांनुसार अत्यंत काळजीपूर्वक विल्हेवाट लावणे.
दक्षता: अनावश्यक भीती न बाळगता रुग्णांच्या लक्षणांवर बारकाईने लक्ष ठेवणे.