
खासदार सुनिल तटकरेंना निवडून आणले ही आमची चूक होती
पालकमंत्रीपदावरुन महायुतीत ठिणगी, मंत्र्यांची तटकरे यांच्यावर जोरदार टिका, केला हा आरोप
रायगड – पालकमंत्रिपदावरून आता महायुतीमध्ये जुंपल्याची पाहायला मिळत आहे. पालकमंत्रिपदाची यादी जाहीर करण्यात आली. मात्र या यादीमध्ये शिवसेना नेते भरत गोगावले आणि दादा भुसे यांना स्थान देण्यात आले नाही.
गोगावले रायगड जिल्ह्याच्या पालकमंत्री पदासाठी आग्रही होते. त्यामुळे ते आक्रमक झाले असून त्यांनी खासदार सुनिल तटकरे यांच्यावर टिका करत गंभीर आरोप केले आहेत. ते म्हणाले, राज्यात कोणतच सीट निवडून आलं नाही, मात्र रायगडचा किल्ला राखण्यात यश आलं. आम्ही तिघांनी केलेल्या प्रयत्नामुळे सुनील तटकरे निवडून आले, मात्र त्यांनी तिघांना पाडण्याचा प्रयत्न केला, असा आरोप गोगावले यांनी केला आहे, गोगावले यांच्या आरोपांनंतर आता हा वाद आणखी पेटण्याची शक्यता आहे. तसेच जनतेने आम्हाला निवडून दिले आहे. त्यांची ही भावना आहे. याआधी शिंदेंनी एका इशाऱ्यावर सांगितले आणि आम्ही थांबलो. पण आता लोकांची इच्छा आहे असे गोगावले म्हणाले आहेत. दरम्यान मंत्री गोगावले, महेंद्र दळवी, महेंद्र थोरवे हे उपमुख्यमंत्री शिंदेंच्या भेटीला जाणार असल्याचीही माहिती समोर येत आहे. पालकमंत्री पद न मिळाल्याने रायगड जिल्ह्यातील भरत गोगावले यांचे समर्थक चांगलेच नाराज झाले आहेत. त्यांनी राजीनामे दिले असल्याची चर्चा असून जोपर्यंत भरत गोगावले हे पालकमंत्री होणार नाहीत तोपर्यंत आम्ही काम करणार नाही, अशी आक्रमक भूमिका त्यांनी घेतली आहे.
पालकमंत्रिपदाच्या वाटपावरून उपमुख्यमंत्री एकनाथ शिंदे हे नाराज असल्याची चर्चा आहे. ते दादा भुसे आणि भरत गोगावले यांच्या पालकमंत्रिपदासाठी आग्रही होते. मात्र त्यांना पालकमंत्री पद न मिळाल्यानं एकनाथ शिंदे हे नाराज असल्याची चर्चा आहे.