पुणे शहरातील हडपसर आणि पिंपरी-चिंचवडमधील फुगेवाडी परिसरात घडलेल्या एका भीषण विषारी दारुकांडाने संपूर्ण महाराष्ट्र हादरला आहे. या विषारी दारूच्या प्राशनामुळे आतापर्यंत १३ हून अधिक निष्पाप नागरिकांचा मृत्यू झाला असून अनेक संसार उघड्यावर आले आहेत. देशात आणि राज्यात दर काही वर्षांनी अशा विषारी दारूच्या दुर्घटना घडूनही, स्थानिक पातळीवरील गावठी दारू आणि हातभट्ट्यांवर पोलीस प्रशासन कठोर कारवाई करत नसल्याचा गंभीर आरोप मृतकांच्या नातेवाईकांकडून केला जात आहे. पोलीस आणि दारू माफियांच्या कथित अभद्र युतीमुळेच हे बळी गेल्याचे बोलले जात असून, सध्या पोलिसांच्या कार्यपद्धतीवर मोठे प्रश्नचिन्ह निर्माण झाले आहे.
या दुर्दैवी घटनेत फुगेवाडी येथील राठोड कुटुंबावर दुःखाचा डोंगर कोसळला आहे. विजय राठोड (३१) आणि राजेंद्र राठोड (३४) या दोन सख्ख्या भावांचा या विषारी दारूमुळे मृत्यू झाला आहे. घरातील दोन्ही कमावते पुरुष गेल्याने संपूर्ण राठोड कुटुंब उद्ध्वस्त झाले असून, तरुण मुलांच्या मृत्यूच्या धक्क्याने त्यांच्या वडिलांची प्रकृतीही अत्यंत चिंताजनक बनली आहे. या प्रकरणात पोलिसांनी तपासाची चक्रे फिरवत योगेश वानखेडे नावाच्या मुख्य संशयिताला अटक केली आहे. याच आरोपीने हडपसर आणि फुगेवाडी या दोन्ही ठिकाणच्या अवैध अड्ड्यांवर विषारी दारूचा पुरवठा केल्याचा प्राथमिक अंदाज पोलिसांनी वर्तवला आहे.”गेल्या २५ वर्षांपासून आमच्या परिसरात हा अवैध दारूचा धंदा सर्रास सुरू होता. आम्ही वारंवार तक्रारी करूनही प्रशासनाने कोणतीच ठोस पावले उचलली नाहीत. जर पोलिसांनी वेळीच कडक भूमिका घेतली असती, तर आज आमचा २८ वर्षांचा तरुण अक्षय आमच्यात जिवंत असता…”
अक्षय अवसरमल याचे शोकाकुल कुटुंब
या भीषण घटनेनंतर राजकीय स्तरातूनही तीव्र प्रतिक्रिया उमटत आहेत. स्थानिक आमदार अण्णा बनसोडे यांनी या संपूर्ण प्रकरणाची दखल घेत वरिष्ठ पोलीस अधिकाऱ्यांशी चर्चा केली आहे. याप्रकरणी आतापर्यंत ८ आरोपींना बेड्या ठोकण्यात आल्या असून, इतर संशयितांचा शोध सुरू असल्याचे त्यांनी सांगितले. ही घटना अत्यंत दुर्दैवी असून अशा अवैध दारूच्या गुत्त्यांवर मुळासकट कारवाई करण्याचे आदेश त्यांनी पोलिसांना दिले आहेत. तसेच, या घटनेत मृत्युमुखी पडलेल्या गरिबांच्या आणि कष्टकऱ्यांच्या कुटुंबांना शासनाने तातडीने आर्थिक मदत करावी, अशी मागणीही आमदार बनसोडे यांनी केली आहे.
