“बँकिंग सेवांवर संपाचे सावट! स्टेट बँक सलग चार दिवस बंद; तुमचे महत्त्वाचे व्यवहार आजच उरका.”

भारतीय स्टेट बँकेच्या (SBI) ग्राहकांसाठी एक महत्त्वाची बातमी आहे. या महिन्याच्या अखेरीस बँकेच्या सेवांवर मोठा परिणाम होऊ शकतो. कर्मचारी युनियनने दोन दिवसांच्या देशव्यापी संपाची घोषणा केली असून यामुळे सलग चार दिवस बँकांचे कामकाज ठप्प राहण्याची शक्यता आहे.4 दिवस बँका बंद राहू शकतात
‘ऑल इंडिया स्टेट बँक ऑफ इंडिया स्टाफ फेडरेशन’ने 25 आणि 26 मे रोजी संपाची घोषणा केली आहे. त्यापूर्वी 23 मे रोजी चौथा शनिवार आणि 24 मे रोजी रविवार असल्याने बहुतांश SBI शाखा सलग चार दिवस बंद राहू शकतात. डिजिटल सेवा सुरू राहतील मात्र काही कामांना विलंब होऊ शकतो.

बँक संप का होत आहे?
युनियनच्या मते, प्रदीर्घ काळापासून प्रलंबित असलेल्या मुद्द्यांकडे लक्ष वेधण्यासाठी हे आंदोलन केले जात आहे. यामध्ये कर्मचाऱ्यांची कमतरता, सेवेच्या अटी, भरती धोरण आणि पेन्शनशी संबंधित प्रकरणांचा समावेश आहे. कर्मचाऱ्यांशी झालेले अनेक करार अद्याप लागू झाले नसल्याचा आरोप युनियनने केला आहे.

युनियनच्या एकूण 16 मागण्या
2 मे रोजी SBI अध्यक्षांना दिलेल्या नोटीसमध्ये म्हटले आहे की हा संप ‘इंडस्ट्रियल डिस्प्यूट्स ॲक्ट 1947’ अंतर्गत केला जाईल. जर मध्ये सार्वजनिक सुट्टी आली तर हा संप 27 मे पर्यंत वाढू शकतो, असे संकेतही युनियनने दिले आहेत.

युनियनच्या प्रमुख 16 मागण्या

सपोर्ट स्टाफची भरती आणि सुरक्षा कर्मचाऱ्यांच्या स्थितीत सुधारणा

वेतन विसंगती दूर करणे

नॅशनल पेन्शन  अंतर्गत चांगले पेन्शन पर्याय

करिअर प्रगतीमध्ये बदल आणि पेन्शन गणनेत अतिरिक्त घटकांचा समावेश

भरती प्रक्रियेतील घट
मेसेंजर आणि आर्मड गार्ड (सशस्त्र रक्षक) सारख्या पदांच्या भरतीमध्ये मोठी घट झाली आहे, असा दावा युनियनने केला आहे. यामुळे रोजगाराच्या संधी कमी झाल्या असून शाखांच्या सुरक्षेवरही परिणाम झाला आहे.

आंदोलनाची रूपरेषा
संपापूर्वी 5 ते 18 मे या कालावधीत निदर्शने, सोशल मीडिया मोहीम, प्रेस मीट आणि धरणे आंदोलन केले जाईल. तसेच 19 मे रोजी अर्थमंत्र्यांना आणि 21 मे रोजी पंतप्रधानांना निवेदन सोपवण्याची योजना आहे. जर हा संप झाला तर 25 आणि 26 मे रोजी कॅश व्यवहार, चेक क्लिअरिंग आणि शाखांमधील प्रत्यक्ष सेवा प्रभावित होऊ शकतात. मात्र ग्राहकांसाठी डिजिटल बँकिंग सेवा सुरू राहतील.