प्रेयसीसाठी भाजप नेत्यानी केली पत्नीची हत्या

अजमेर – राजस्थानातील अजमेरमधून एक धक्कादायक प्रकार उघडकीस आला आहे. भाजपच्या नेत्यानेच पत्नीची निर्घृण हत्या केल्याची धक्कादायक घटना समोर आली आहे. अनैतिक संबंधामध्ये पत्नी अडथळा ठरत असल्यामुळे पत्नीची हत्या करण्यात आली.

हत्या करण्यात आलेल्या महिलेचे नाव संजू सैनी आहे. तर भाजप नेत्याचे नाव रोहित सैनी असे आहे. भाजप नेता रोहित सैनी याने त्याच्या घटस्फोटित प्रेयसीसाठी पत्नी संजू सैनीची हत्या केली. पोलिसांनी दिलेल्या माहितीनुसार, रितू सैनी ही रोहितला त्याच्या पत्नीची हत्या करण्यास भाग पाडत होती. रोहित आणि रितू सैनी यांचे दोन वर्षांपासून प्रेमसंबंध होते. जोपर्यंत पत्नीला सोडत नाही ती तोपर्यंत तुझ्यासोबत राहणार नाही असा दबाव रितू रोहितवर दबाव आणत होती. यामुळे रोहितने त्याच्या प्रेयसीसह पत्नीपासून सुटका मिळवण्यासाठी संजूची हत्या केली. रोहिती सैनी याची पत्नी संजू १० ऑगस्ट रोजी राहत्या घरी संशयास्पद परिस्थितीत मृतावस्थेत आढळली होती. अज्ञात चोरट्यांनी हत्या करुन घरातील मौल्यवान वस्तू लुटून नेल्याचा दावा रोहित सैनीने सुरुवातीला केला होता. मात्र, तपासादरम्यान त्याच्या बोलण्यात विसंगती आढळल्यामुळे पोलिसांना संशय आला. कसून चौकशी केल्यानंतर रोहितने खुनाची कबुली दिली आणि संपूर्ण कट उघड केला. संजू मार्गातील अडथळा ठरत असल्यामुळे रितूने रोहितला तिला मार्गातून हटवण्यास सांगितल्याचा आरोप आहे. पत्नीची हत्या केल्यानंतर रोहितने या घटनेला लुटमारीचा रंग देऊन गुन्हा लपवण्याचा प्रयत्न केला होता.

रोहित आणि रितू दोघांनाही राजस्थानच्या अजमेरमध्ये ताब्यात घेण्यात आले आहे. या प्रकरणातील अधिक माहिती मिळवण्यासाठी पुढील चौकशी सुरू आहे, असे अधिकाऱ्यांनी सांगितले. रितूनेच संजूला संपवण्यासाठी रोहितवर दबाव आणला होता. या खळबळजनक घटनेमुळे राजस्थानमध्ये संताप व्यक्त केला जात आहे.