महाराष्ट्रात मतदार याद्यांचा सुधारित पुनरीक्षण कार्यक्रम जाहीर; ‘या’ दिवशी प्रसिद्ध होणार अंतिम यादी!

भारत निवडणूक आयोगाने महाराष्ट्रातील विधानसभा मतदारसंघांच्या मतदार याद्यांच्या विशेष सखोल पुनरिक्षणाचा सुधारित कार्यक्रम अधिकृतपणे जाहीर केला आहे. १ ऑक्टोबर २०२६ ही पात्रता तारीख (Qualifying Date) निश्चित करून ही संपूर्ण प्रक्रिया राबवली जाणार आहे.

या मोहिमेदरम्यान मतदान केंद्रांचे सुसूत्रीकरण करणे आणि प्रारूप मतदार याद्या तयार करण्यासंबंधीची तांत्रिक प्रक्रिया अचूकपणे पूर्ण करणे हा मुख्य उद्देश आहे. या तांत्रिक बाबी वेळेत पूर्ण व्हाव्यात यासाठी वेळापत्रकात आवश्यक सुधारणा करण्यात आल्याचे निवडणूक आयोगाने स्पष्ट केले आहे.

असे असेल सुधारित वेळापत्रक:

२४ ऑगस्ट २०२६: मतदान केंद्रांचे सुसूत्रीकरण व पुनर्रचना पूर्ण करणे.

३१ ऑगस्ट २०२६: प्रारूप (Draft) मतदार यादी प्रसिद्ध करणे.

३१ ऑगस्ट ते ३० सप्टेंबर २०२६: प्रारूप मतदार यादीवर दावे व हरकती दाखल करण्याचा कालावधी.

३१ ऑगस्ट ते २९ ऑक्टोबर २०२६: प्राप्त झालेल्या दावे व हरकतींबाबत नोटीस देणे आणि त्यांचा निपटारा करणे.

४ नोव्हेंबर २०२६: महाराष्ट्रातील अंतिम (Final) मतदार यादी प्रसिद्ध करणे.

या सुधारित कार्यक्रमामुळे नागरिकांना आपल्या नावात दुरुस्ती करणे, नवीन नोंदणी करणे किंवा हरकती नोंदवण्यासाठी पुरेसा वेळ मिळणार आहे.

मतदार यादी किंवा नोंदणीशी संबंधित अधिकृत माहितीसाठी मदत:

मतदार यादीतील नाव तपासणे, नवीन नोंदणी करणे, किंवा आपल्या क्षेत्रातील मतदान केंद्राची माहिती मिळवण्यासाठी नागरिकांनी भारत सरकारच्या अधिकृत Voters’ Services Portal ला भेट द्यावी. तसेच महाराष्ट्रातील मतदार नोंदणी आणि इतर स्थानिक अपडेट्ससाठी Chief Electoral Officer, Maharashtra च्या अधिकृत संकेतस्थळाचा वापर करावा.