बारामती हादरली! बनावट उत्पन्नाचा दाखला तयार करण्यासाठी ‘ChatGPT’चा वापर; आरोपीवर गुन्हा दाखल

शासकीय दाखल्यांसाठी आधुनिक तंत्रज्ञानाचा गैरवापर करून प्रशासनाची फसवणूक केल्याची एक धक्कादायक घटना बारामतीमध्ये उघडकीस आली आहे. उत्पन्नाचा बनावट दाखला (Fake Income Certificate) तयार करण्यासाठी प्रसिद्ध AI टूल ChatGPT चा वापर केल्याप्रकरणी एका व्यक्तीविरोधात बारामती शहर पोलीस ठाण्यात गुन्हा दाखल करण्यात आला आहे. डिजिटल उपक्रमांचा अशा प्रकारे गैरवापर झाल्याने प्रशासकीय वर्तुळात मोठी खळबळ उडाली आहे.

असा उघड झाला गैरप्रकार

बारामती येथील खंडोबानगर परिसरात राहणारे आरोपी अजिज जाफर सय्यद यांनी उत्पन्नाचे प्रमाणपत्र मिळवण्यासाठी ‘ChatGPT’ या AI टूलचा आधार घेतला. संगणकीय प्रणालीच्या साहाय्याने बनावट दाखला तयार करून, तो शासकीय प्रक्रियेत खरा असल्याचे भासवून तहसील कार्यालयात सादर केला. तहसील कार्यालयाच्या प्राथमिक पडताळणीदरम्यान सादर केलेल्या दाखल्याबाबत अधिकाऱ्यांना शंका आली. त्यानंतर झालेल्या सखोल कार्यालयीन चौकशीत संबंधित दाखला अधिकृत नसून तो एआय टूलच्या मदतीने तयार करण्यात आल्याचे निष्पन्न झाले. आरोपी अजिज सय्यद यांनी स्वतःच्या लेखी जबाबात दाखला तयार करण्यासाठी ChatGPT चा वापर केल्याची कबुली दिली आहे.

बारामती शहर पोलिसांत गुन्हा दाखल

शासकीय यंत्रणेची फसवणूक केल्याप्रकरणी बारामती शहर पोलीस ठाण्यात भारतीय न्याय संहिता २०२३ मधील विविध कलमांअंतर्गत गुन्हा दाखल करण्यात आला आहे. आरोपीने ChatGPT आणि इतर डिजिटल एडिटिंग टूल्सचा वापर करून हे प्रमाणपत्र कसे तयार केले, याची तांत्रिक तपासणी पोलिसांकडून केली जात आहे.

तपासातील महत्त्वाचे मुद्दे:

तहसील कार्यालयातील डिजिटल स्वाक्षऱ्या आणि कागदपत्रांची पडताळणी सुरू.

एआयचा वापर करून इतर कोणी अशा प्रकारे बनावट दाखले तयार केले आहेत का, याचा शोध.

प्रशासकीय प्रक्रियेत AI चा गैरवापर करून गुन्हा घडल्याची ही बारामतीतील पहिलीच घटना.

पोलीस तपासात आता आणखी काय नवे खुलासे होतात, याकडे सर्वांचे लक्ष लागले आहे.