सिलेंडर चोरीचं ‘रॅकेट’ उद्ध्वस्त: अट्टल गुन्हेगारांकडून डझनावारी सिलेंडर जप्त; पोलिसांची मोठी कारवाई.

गॅस एजन्सीच्या गोडावूनचे कुलूप तोडून मोठ्या प्रमाणात गॅस सिलेंडर चोरी करणाऱ्या अट्टल गुन्हेगारांच्या टोळीला स्थानिक गुन्हे शाखेने अटक केली आहे. या कारवाईत एकूण 4 लाख 27 हजार 500 रुपयांचा मुद्देमाल जप्त करण्यात आला आहे.

फैजपूर व वरणगाव पोलीस ठाण्यांमध्ये दाखल दोन वेगवेगळ्या गुन्ह्यांचा तपास करताना ही कारवाई करण्यात आली. फैजपूर येथील श्रीधर गॅस एजन्सीचे संचालक ललित राणे यांनी दि. 25 एप्रिल 2026 रोजी दिलेल्या फिर्यादीनुसार, अज्ञात चोरट्यांनी गोडावून फोडून सुमारे 3 लाख 11 हजार 800 रुपयांचे 100 भरलेले गॅस सिलेंडर चोरून नेले होते. तसेच वरणगाव येथील घटनेत 57 सिलेंडर चोरीला गेल्याची नोंद होती. या दोन्ही गुन्ह्यांचे गांभीर्य लक्षात घेऊन पोलीस अधीक्षक श्रीकांत धिवरे यांच्या मार्गदर्शनाखाली स्थानिक गुन्हे शाखेने दोन स्वतंत्र तपास पथके तयार केली. गोपनीय माहिती, तांत्रिक विश्लेषण आणि सीसीटीव्ही फुटेजच्या आधारे संशयित वाहनांचा मागोवा घेत आरोपींपर्यंत पोहोचण्यात पोलिसांना यश आले.

या प्रकरणी शेख बिलाल शेख नवी (वय 32, रा. कासोदा, ता. एरंडोल), वसीम खान शाबीर खान (वय 31, रा. तांबापुरा, जि. जळगाव), चेतन सुरेश काळे (वय 38, रा. नशिराबाद, ता. भुसावळ) यांना अटक करण्यात आली आहे. सखोल चौकशीत आरोपींनी आपल्या इतर साथीदारांसह दोन्ही गुन्हे केल्याची कबुली दिली आहे. त्यांच्या ताब्यातून 62 भरलेले व 95 रिकामे गॅस सिलेंडर तसेच एक सुझुकी बर्गमन मोपेड असा एकूण 4.27 लाखांचा मुद्देमाल जप्त करण्यात आला आहे. सदर आरोपींना फैजपूर पोलीस ठाण्याच्या ताब्यात देण्यात आले असून पुढील तपास पोलीस उपनिरीक्षक मैनुद्दीन सैय्यद व विनोद गाभणे करीत आहेत.