महाराष्ट्रातील तमाम जनतेसाठी एक अत्यंत महत्त्वाची बातमी समोर आली आहे. आगामी 20 मे 2026 रोजी पुणे शहरासह संपूर्ण राज्यातील औषध दुकाने बंद ठेवण्याचा निर्णय घेण्यात आला आहे.अखिल भारतीय औषध विक्रेता संघटनेने पुकारलेल्या देशव्यापी आंदोलनात राज्यातील सर्व मेडिकल स्टोअर्स सहभागी होणार असल्याने एकाच दिवशी सर्व दुकाने कडकडीत बंद राहतील.
बंद पुकारण्यामागचे मुख्य कारण
औषध विक्रेत्यांनी हे टोकाचे पाऊल उचलण्यामागे काही प्रमुख कारणे आहेत. देशभरात बेकायदेशीर आणि नियमबाह्य पद्धतीने सुरू असलेल्या ऑनलाईन औषध विक्रीला संघटनेचा तीव्र विरोध आहे. तसेच मोठ्या कॉर्पोरेट कंपन्यांकडून होणाऱ्या गळेकापू आणि अव्यवसायिक स्पर्धेमुळे छोट्या औषध विक्रेत्यांचे अस्तित्व धोक्यात आल्याचा आरोप औषध विक्रेत्यांकडून कऱण्यात येत आहे.याशिवाय ऑनलाईन औषध विक्रीमुळे रुग्णांच्या आरोग्याला गंभीर धोका निर्माण होऊ शकतो, असा दावा संघटनेचे अध्यक्ष जगन्नाथ शिंदे यांनी केला आहे. या अनियंत्रित स्पर्धेमुळे पारंपरिक औषध विक्रेत्यांचे मोठ्या प्रमाणावर आर्थिक नुकसान होत असल्याचे त्यांनी म्हटले आहे.
सरकारच्या भूमिकेवर नाराजी
संघटनेच्या वतीने या गंभीर प्रश्नाबाबत केंद्र सरकारचे संबंधित मंत्री आणि वरिष्ठ अधिकाऱ्यांना वेळोवेळी निवेदने देण्यात आली आहेत. मात्र, प्रशासनाकडून या मागण्यांकडे सातत्याने दुर्लक्ष केले जात असल्याचा आरोप औषध विक्रेता संघटनेने केला आहे. आपल्या मागण्यांकडे लक्ष वेधण्यासाठीच हा देशव्यापी बंद पुकारण्यात आला आहे.रुग्णांसाठी अत्यावश्यक सुविधा.20 मे रोजी होणाऱ्या या बंदमुळे नागरिकांची मोठी गैरसोय होण्याची शक्यता असली, तरी संघटनेने एक दिलासादायक माहिती दिली आहे. बंद दरम्यान सर्व नियमित औषध दुकाने बंद असली, तरी रुग्णांची तातडीची गरज लक्षात घेतली जाईल. अतिशय निकडीच्या प्रसंगी रुग्णांना अत्यावश्यक औषधे उपलब्ध करून देण्यात येतील, असे संघटनेकडून स्पष्ट करण्यात आले आहे. नागरिकांनी या बदलाची नोंद घेऊन आवश्यक औषधांची बेगमी आधीच करून ठेवणे सोयीचे ठरेल.
