पुण्यात पोलिसांच्या अडवणूकीमुळे ट्रेन हुकल्याने तरूणाचा राडा

पुणे दि १७(प्रतिनिधी)- एका विद्यार्थीला अलका चौकात गावाला जात असताना पोलिसांनी अडवल्यामुळे त्याची ट्रेन चुकली आणि त्या विद्यार्थीचा संताप अनावर झाला. त्याने थेट रस्त्यावर झोपून निषेध केला आणि अल्का चौकात एकच गोंधळ उडाला. राहुल धने असं या विद्यार्थीचं नाव आहे. त्याने रस्त्यावर झोपून केलेले आंदोलन सोशल मिडीयावर व्हायरल झाला आहे.

राहुल मूळचा यवतमाळला राहणारा आहे तर तो पुण्यात एमपीएससीचा अभ्यासासाठी आला आहे. राहुल दिवाळीनिमित्त गावी जाण्यासाठी मित्रासोबत पुणे रेल्वे स्टेशनकडे निघाला होता. त्याची ३ वाजून १५ मिनीटांनी ट्रेन नियोजित वेळवर सुटणार होती. मात्र, अलका चौकात पोलिसांनी त्याला अडवलं त्याची चौकशी केली असताना लायसन्स, गाडीचे पेपर सगळे ओके होते. पण त्याच्यावर आधीच कुठे तरी नियम मोडल्यामुळे जुना दंड भरलेला नसल्याचं चलन बाकी होते.पोलिसांनी त्याला ते चलन भरण्यास सांगितले. परंतु तेवढे पैसे त्या दोघांकडेही नव्हते. पण अगोदर चलन भरायला सांगत गाडी अडवून धरली. त्यामुळे राहुलची ट्रेन निघून गेली. त्यामुळे संतापलेल्या राहुलने अलका चाैकात रस्त्यावर झोपला. त्यामुळे चांगलाच राडा झाला.या घटनेनंतर स्वतः पोलिसांनी त्याला विनंती करुन रिक्षात बसवून एका खासगी ट्रॅव्हल्समध्ये तिकीट काढून गावाला पाठवले.आणि हा राडा शांत झाला.

ट्रेन हुकल्यामुळे राहुल म्हणाला “सहा महिने मी घरी गेलो नव्हतो. माझी आर्थिक परिस्थिती बिकट आहे. माझ्याकडे तिकीट खरेदी करण्याचे पैसे नव्हते. पण पोलिसांच्या मुजोरीमुळे आता मी गावाला जाऊ शकत नाही. माझे कुटुंब आतुरतेने माझी वाट पाहत आहे. आता मी काय करु म्हणून आता मरेपर्यंत मी हिथेच झोपून राहणार आहे” असा पवित्रा घेतला होता. पण अखेर पोलीसांनी त्याची गावी जाण्याची सोय केली.