१४० पेक्षा जास्त उच्चशिक्षित तरुणींना प्रेमाच्या जाळ्यात ओढून कोट्यवधींची फसवणूक; अट्टल भामटा आदर्श म्हात्रे गजाआड

सोशल मीडियावर अनोळखी व्यक्तींशी वाढणारी मैत्री किती महागात पडू शकते, याचा एक अत्यंत धक्कादायक आणि थरारक प्रकार डोंबिवलीत समोर आला आहे. प्रेमाच्या जाळ्यात ओढून उच्चशिक्षित तरुणींची कोट्यवधी रुपयांची भावनिक आणि आर्थिक फसवणूक करणाऱ्या आदर्श म्हात्रे या अट्टल भामट्याला डोंबिवलीच्या मानपाडा पोलिसांनी ताब्यात घेतले आहे.आरोपी आदर्श म्हात्रे हा मूळचा पनवेल परिसरातील रहिवासी आहे. विशेष म्हणजे, यापूर्वीही त्याला अशाच प्रकारच्या गुन्ह्यांसाठी नवी मुंबई पोलिसांनी अटक केली होती. मात्र, त्याच्या गुन्हेगारी प्रवृत्तीत कोणताही फरक पडला नसल्याचे या नव्या प्रकरणावरून समोर आले आहे.

१४० हून अधिक तरुणींना बनवले सावज!

पोलीस तपासातून समोर आलेली आकडेवारी पाहून स्वतः पोलीस प्रशासनही चक्रावून गेले आहे. आरोपी आदर्श म्हात्रे याने आतापर्यंत सोशल मीडियाच्या माध्यमातून तब्बल १४० हून अधिक तरुणींना आपल्या जाळ्यात ओढले होते. या फसवणुकीला कंटाळून आतापर्यंत ११ पीडित तरुणींनी हिंमत दाखवून पोलिसांकडे अधिकृत तक्रारी नोंदवल्या आहेत.

जाळ्यात अडकलेल्या महिला मोठ्या पदांवर कार्यरत

या प्रकरणातील सर्वात धक्कादायक बाब म्हणजे, या भामट्याच्या जाळ्यात अडकलेल्या बहुतांश महिला या अत्यंत उच्चशिक्षित आहेत. पीडित महिलांमध्ये कॉर्पोरेट, बँकिंग, आर्थिक क्षेत्र आणि व्यावसायिक क्षेत्रांत मोठ्या हुद्द्यांवर व पदांवर कार्यरत असलेल्या महिलांचा समावेश आहे. आरोपी सर्वप्रथम फेसबुक आणि इन्स्टाग्रामच्या माध्यमातून तरुणींशी संपर्क साधायचा आणि त्यांच्याशी मैत्री करायचा. मैत्रीचे रूपांतर हळूहळू प्रेमात करून तो तरुणींचा विश्वास संपादन करायचा आणि त्यांच्याशी शारीरिक संबंध प्रस्थापित करायचा. तरुणींचा पूर्ण विश्वास जिंकल्यानंतर, तो हुशारीने त्यांच्याच कागदपत्रांचा वापर करून त्यांच्या नावावर बँकांमधून लाखो रुपयांचे कर्ज काढायचा. कर्जाची रक्कम हातात पडताच तो तिथून पोबारा करायचा.

डोंबिवलीतील तरुणीच्या तक्रारीनंतर पोलिसांची धडक कारवाई

नवी मुंबई पोलिसांनी आदर्श म्हात्रेला अटक केल्यानंतर त्याच्या फसवणुकीची बातमी समोर आली होती. ही बातमी समजताच डोंबिवलीतील एका पीडित तरुणीनेही धाडस दाखवले आणि आपल्यासोबत झालेल्या फसवणुकीची तक्रार डोंबिवलीच्या मानपाडा पोलीस ठाण्यात नोंदवली. या तक्रारीच्या आधारे मानपाडा पोलिसांनी तातडीने पावले उचलत आरोपी आदर्श म्हात्रेचा ताबा घेतला आहे.

फसवणुकीचा आकडा कोट्यवधींच्या घरात जाण्याची शक्यता

पोलिसांनी दिलेल्या माहितीनुसार, आदर्शविरोधात गुन्हा दाखल करून सखोल तपास सुरू करण्यात आला आहे. आरोपीने केवळ डोंबिवली किंवा नवी मुंबईतच नाही, तर राज्यातील इतर शहरांतील महिलांनाही लुटल्याची दाट शक्यता आहे. आणखी अनेक पीडित महिला तक्रार देण्यासाठी पुढे येण्याची शक्यता असून, फसवणुकीचा हा आकडा आणि एकूण रक्कम कोट्यवधींच्या घरात जाण्याचा अंदाज पोलिसांनी व्यक्त केला आहे.

सावधानतेचा इशारा

या धक्कादायक प्रकरणामुळे सोशल मीडियावरील अनोळखी व्यक्तींशी वाढणारी मैत्री, ऑनलाईन नातेसंबंध आणि त्यातून होणारी भावनिक व आर्थिक फसवणूक हा अत्यंत गंभीर मुद्दा पुन्हा एकदा ऐरणीवर आला आहे. कोणत्याही व्यक्तीवर सोशल मीडियाच्या माध्यमातून अंधश्रद्धेसारखा विश्वास ठेवू नये, असे आवाहन पोलिसांकडून केले जात आहे.